د رياست الوزرا اقتصادي معاونيت وايي، د دغه معاونيت د سرپرست په شتون کې د خواف _ هرات رېل پټلۍ د څلورمې قطعې د جوړېدو تړون پرون مازيګر لاسليک شو.
ياد تړون د اوسپنې پټلۍ ملي ادارې او ګاما ګروپ ترمنځ لاسليک شوی.
دغه رېل پټلۍ ۴۷ کيلو متره اوږدوالی لري چې په جوړېدو به يې ۵۳ ميليونه ډالره لګښت راشي.
د دغې پروژې چارې به په راتلونکو دوو کلونو کې بشپړې شي.
ياده پروژه چې چې د هرات د اوسپنې پټلۍ د لويې پروژې وروستۍ برخه ده چې د دغه ولايت له رباط پريان څخه پيل د هرات هوايي ډګر او صنعتي ښارګوټي ته رسيږي.
دغه پروژه به افغانستان د ايران له مهمو سمندري بندرونو سره ونښلوي.
د سرچينې د مالوماتو له مخې دغه پروژه به د ترکيې د اوسپنې پټلۍ له لارې افغانستان د منځنۍ او سويلي آسیا ترمنځ هم د سوداګرۍ کچه لوړه کړي.
د يادونې وړ ده، چې د دغې پروژې له جوړېدو وروسته به په فراه، نيمروز، هلمند وو کندهار کې هم د اوسپنې پټلۍ جوړېدو ته زمينه مساعده شي.
