سرپرست حکومت له پاکستان څخه افغانستان ته د پاکستاني طالبانو د رالېږدولو او دلته د اوسېدلو په خاطر له پاکستانه د ۱۰ میلیارده پاکستانۍ کالدارو د غوښتلو ادعا رد کړې ده.
د سرپرست حکومت مرستیال ویاند حمدالله فطرت په یوه غږیز کلیپ کې ویلي چې دوی له پاکستانه دا غوښتنه نه ده کړې او ددغه لوړ پوړي پاکستاني چارواکي ادعاوې یې د تاسف وړ بللي دي.
فطرت پخپلو خبرو کې ویلي چې پاکستاني چارواکي د خپلو موخو د ترلاسه کولو لپاره دا ډول ادعا کوي.
سرپرست حکومت په داسې حال کې دا ادعا ردوي چې تازه د پاکستان هېواد د دفاع وزیر خواجه اصف د یاد هېواد جیو نیوز ټلویزیون سره په مرکه کې ویلي چې افغانستان ته د سفر پرمهال ورڅخه سرپرست حکومت په افغانستان کې د پاکستاني طالبانو د اوسېدو او را انتقالولو له پاره د ۱۰ میلیارده پاکستانیو کالدارو غوښتنه کړې ده.
