د صنعت او سوداګرۍ وزارت ویلي، چې د تېر نیم کال په موده کې له ایران سره د افغانستان د سوداګرۍ کچه یو میلیارد او ۶۲۶ میلیونه ډالرو ته رسېدلې ده.
دغه راز ایران د افغانستان پر وارداتي توکو د ګودام ساتنې پر لګښتونو ۷۵ سلنه او د لنگر اچونې یا بندر ته د کښته کولو لګښتونو کې ۵۵ سلنه تخفیف کړی دی.
د صنعت او سوداکرۍ وزارت ویاند، آخندزاده عبدالسلام جواد، نن په یوه ویډیويي پیغام کې ویلي، چې حکومت هڅه کوي افغانستان د سیمې د هېوادونو لپاره د ترانزیت څلورلارې مرکز کړي او د سوداګریزو لارو د یووالې مخنیوي لپاره به د چابهار بندر څخه استفاده زیاته کړي.
د هغه پر وینا، دا اقدامات د ترانزیتي لارو د پراخېدو، د بیو د کنټرول، د صادراتو د بندېدو مخنیوي، د سوداګرو د ستونزو هوارولو او نړۍوالو اوبو ته د لاسرسي په موخه ترسره کېږي.
نوموړي زیاته کړې، چې ایران د افغانستان توکو ته په بندرونو کې د ۷۵ سلنه ګودام ساتنې او ۵۵ سلنه لنگر اچونې لګښتونو کې تخفیف کړی دی.
