د بهرنیو چارو وزارت سیاسي مرستیال شېر محمد عباس ستانکزی د ګرځندوی د نړیوالې ورځې نمانځغونډه کې وایي؛ په ګاونډیو او د نورو هېوادونو کې پر افغان کډوالو راغلی وضعیت د منلو وړ نه دی.
هغه دې غونډه کې د خبر پر مهال زياته کړه، چې پاکستان دې د افغان کډوالو له زورونې لاس واخلي او په وینا یې، دوی سره دې د کډوالۍ د نړیوالو قوانینو سره سم چلن وکړي.
ستانکزي وويل، ګاونډي هېوادونه په ځانګړې توګه پاکستان دې له افغان کډوالو سره له ناسم چلن ډډه وکړي کنه د یاد وضعیت دوام به د دواړو هېوادونو اړیکې خرابې کړي.
پاکستان څو ورځې وړاندې په رسمي ډول له دې هېواده د غير قانوني افغان کډوالو د ويستلو اعلان وکړ.
اسلام اباد کې د افغانستان دسفارت مسوولین وايي، چې تېرو دوه اونيو کې پاکستاني پولیسو له زرو زيات افغان کډوال نيولي دي.
پاکستاني رسنيو تازه راپور ورکړی، چې د دې هېواد کابيني پرېکړه کړې څو دې هېواد کې مېشت ۱.۵ ميليارده افغان کډوال چې قانوني اسناد نه لري له دې هېواده وباسي.
د راپورونو له مخې د تازه پرېکړې پر بنياد به لومړی هغه افغانان له دې هېواده وویستل شي، چې ويزې یې نه دي تمديد کړي.
