د غزني ولایت په اندړو ولسوالي کې د ترکیې هېواد د «IDDEF» مؤوسسې په مالي لګښت یو مجهز او معیاري دارالیتام جوړ او ګټې اخیستنې ته وسپارل شو.
د غزني والي محمدامین جان عمري پرون شنبه د «اکتوبر ۲۸مه» د دغه دارالیتام د پرانستې په مراسمو کې وویل چې دغه دارالیتام ۲۰ درسي او ادارې خونې لري چې په یو وخت به پکې ۶سوه یتیمو زدهکوونکو ته د زدهکړو زمینه برابره شي.
د هغه په خبره، دغه دارالیتام په دوه پوړونو او یو جریب ځمکه کې د یولک او ۸۰زره امریکايي ډالرو په لګښت جوړ شوی دی.
والي وویل، په دغه دارالیتام کې د زدهکوونکو ټول د خوړو، اوسیدو، او تدریس لګښت د یادې ترکي مؤوسسې له لوري ورکول کیږي.
د یادونې وړ ده چې له دې دوه ورځې وړاندې بیا د غزني په قرهباغ ولسوالي کې د « IHH» په نوم د یوې بلې ترکي مؤوسسي له لوري یو بل دارالیتام جوړ او ګټې اخیستنې ته وسپارل شو.
