د فاریاب ولایت د اطلاعاتو او کلتور ریاست مسوولانو ویلي چې په یاد ولایت کې د دوه ترافیکې پېښو له امله د دوو ښځو په ګډون درې تنه مړه او شپږ نور ژوبل شوي دي.
د یاد ریاست رئیس شمس الدین محمدي وایې چې دا ترافیکې پېښې پرون او نن د یاد ولایت په پښتونکوټ او جمعه بازار ولسوالیو کې رامنځته شوې دي.
محمدي وایې یوه پېښه له سړک څخه د پلانکوچ موټر د اوښتلو په پایله کې رامنځته شوې چې له امله یې دوه تنه مړه او شپږ نور ژوبل شوي دي او بله پېښه په موټر د یوې ښځې د وهلو په نتیجه کې رامنځته شوې ده.
نوموړي ددغو پېښو لاملونه د موټر چلونکو بې احتیاطې او د سړکونو خرابوالی یاد کړی دی.
باید وویل شي چې تېره یکشنبه د شپې هم په فاریاب ولایت کې د یوې ترافیکې پېښې له امله یوه نجلۍ مړه او ۱۰ تنه ټپیان شوي و.
