د هرات ولايتي مسوولان وايي، چې په دغه ولايت کې د تورغونډۍ بندر له لارې ترکمنستان، قزاقستان، ازبکستان، او نورو هیوادونو ته د افغانستان صادرات د تېر کال په پرتله دوه برابره ډېر شوي دي.
د معلوماتو له مخې، تېر کال د دغه بندر له لارې په ورځني ډول پنځلس لارۍ يادو هېوادونو ته تللې چې اوس يې شمېر په ورځني ډول تر دېرشو پورې رسيږي.
په يادو صادراتو کې تر ډېره له هرات توليد شوي توکي دي چې ډېری هغه یې غیر الکولي مشروبات دي.
د يادونې وړ ده چې په دې وروستيو کې د احصايې او معلوماتو ملي ادارې هم له ټول هیواد څخه بهرنيو هيوادونو ته د صادراتو د ډېروالي خبر ورکړی وو او تازه اقتصادي معاونيت بيا ويلي، د هېواد په ديارلس ولايتونو کې د صادراتو د پروسس زونونه جوړوي.
له افغانستان څخه په صادریدونکو توکو کې غالۍ، قيمتي او نيمه قيمتي ډبرې، وچې مېوې او د تازه میوو جوس شامل دي.
