ارګ پر خپله اکس پاڼه ليکلي، د رياست الوزرا سیاسي مرستيال په کابل کې د روسيې له سفير دیمیتري ژيرنوف سره ليدلي.
په دغه ليدنه کې د روسيې سفير ويلي، له نړيوالې ټولنې يې د حکومت غوښتنه ده چې پر افغانستان دې يو طرفه بنديزونه له قید او شرط پرته لرې کړي.
ورته مهال بیا د ريس الوزرا سیاسي مرستيال د دواړو هېوادونو ترمنځ د اړيکو په پراختيا ټينګار کړی.
نوموړي په نړيواله سطحه د روسيې ستراتیژیکې کچې ته په کتو د افغانستان او روسيې اړيکې مهمی بللي.
نوموړي همداراز د دوحې د وروستۍ ناستې په اړه د روسيې دريځ ستايلی.
ده ويلي، په افغانستان کې د بشپړ امنيت په راتګ سره د دواړو لورو لپاره په اقتصادي، کلتوري او ټرانزیټي برخو کې د همکاريو لپاره زمينه برابره شوې.
ده همداراز ويلي، هيچاته اجازه نه ورکوي چې د افغانستان خاوره د ګاونډیانو او نړۍ پر ضد وکاروي.
نوموړي همداراز زياته کړې هر هغه څوک چې په دې برخه کې اندېښنه لري له دوی سره دې شريکه کړي.
سیاسي مرستیال همداراز د روسيې له سفير غوښتنه کړې، چې روسي پانګوال دې په افغانستان کې د پانګونې له رامنځته شويو فرصتونو څخه په ګټې اخيستنې پانګونه وکړي.
