له ۷۰۰۰ ډیر کډوال له پاکستان او ايران بېرته هېواد ته راشړل شوي.
د کډوالو او بېرته راستنېدونکو چارو وزارت د راپور په اساس پرون دوشنبه د (اکټوبر۲۳) ۵زره او ۱۹۶ کډوال د تورخم او سپين بولدک له لارې له پاکستان څخه افغانستان ته جبرا راشړل شوي.
په دغه کډوالو کې ۶۷۶ کورنۍ د تورخم او ۲۰۹ کورنۍ بيا د سپين بولدک له لارې وطن ته راغلي.
دغه کډوال له راستنېدو وروسته د مرستو لپاره د کډوالو نړيوال سازمان ته ورپېژندل شوي.
همدا راز له ايران څخه هم ۳ زره او ۳۱۰ تنه افغان کډوال بېرته افغانستان ته راغلي.
پاکستان په دې وروستيو کې ګن شمېر افغان کډوال زورولي او جبرا يې له خپل هېواده شړلي.
تازه د سرپرست حکومت د کډوالو او بېرته راستنېدونکو چارو سرپرست وزیر، مولوي خليل الرحمن حقاني ويلي، د ټولو هغه کډوالو لپاره چې بېرته هېواد ته راځي اسانتياوې برابروي.
نوموړي په سپين بولدک کې د يو کمپ د جوړیدو خبره کړې، چې په خبره يې ډېر ژر به يې د جوړېدو چارې پيل شي.
د يادونې وړ ده، چې د افغانستان د تېرې ورځې کرکټ بريا چې له پاکستان يې وګټله ابراهيم ځدران د لوبې غوره لوبغاړي جایزه هغه کډوالو ته ډالۍ کړه، چې له پاکستانه راشړل شوي.
