د لوړو زدکړو وزارت علمي مرستيال دوکتور لطف الله خيرخوا په ننګرهار کې د اقليم بدلون په نړيوال کنفرانس کې ويلي، د افغانستان د لوړو زدکړو وزارت څېړنو ته د زمینې برابرولو په موخه په ملي او نړیوالو کانفرانسونو پانګونه کوي او د پوهنتونونو استادانو ته د څیړنې کولو زمينه برابروي.
نوموړي همداراز ويلي، راتلونکی کال به د پلان له مخې څېړنو ته ښه زمينه برابره کړي.
ورته مهال د لوړو زدکړو وزير هم د اقليمي بدلون د اغیز کمولو لپاره د بودیجې منظورولو اعلان کړی.
نوموړي هيله څرګنده کړې چې دغه کنفرانس به د افغانستان ريښتینی انځور نړۍ ته وښيي.
د اقليم بدلون نړيوال کنفرانس چې ننګرهار پوهنتون کې جوړ شوی، پکې د داخلي استادانو ترڅنګ ګڼو بهرنيو استادانو هم برخه اخيستې.
دغه کنفرانس چې نن شنبه شروع شوی درې ورځې به دوام وکړي.
د يادونې ده، چې ياد کنفرانس کې د سرپرست حکومت لوړپوړو چارواکو هم برخه اخيستې او خبرې يې کړي.
