د اوبو او انرژۍ وزارت خبر ورکړی چې د لوګر ولایت د خروار بند د لومړي فاز د ساتنې او څارنې کارونو له بشپړېدو وروسته د یاد بند د دویم فاز کارونه د څه باندې ۳۵ میلیونه افغانیو په ارزښت پیل شوي دي.
د دغه بند د دویم فاز کارونه د یو لړ مراسمو په ترڅ کې پیل شوي چې پکې د یاد ولایت والي، علماوو، مسوولانو او قومي مشرانو هم ګډون کړی وو.
د اوبو او انرژۍ وزارت د مالومات په اساس د خروار بند د لومړي فاز ساتنې او څارنې پروژه تېرکال د سرپرست حکومت له لوري د ۳۱ میلیونه افغانیو په ارزښت پیل شوې وه چې اوس جوړه او ګټې اخیستنې ته سپارل شوې ده.
د یاد وزارت لخوا په خپره شوې خبرپاڼه کې راغلي چې د دغه بند د دویم فاز کارونه چې تازه پیل شوي دي څه باندې ۳۵ میلیونه افغانۍ لګښت پرې راځي او د پنځه میاشتو په موده کې به یې کارونه بشپړ شي.
د یادونې وړ ده چې دغه بند ۳۶ متره لوړوالی لري او ۱۴۰ متره اوږد دی چې شپږ زره هکټاره ځمکه خړوبولی شي.
