د بهرنيو چارو وزارت مرستيال وياند ضياء احمد تکل پر خپله اکس پاڼه ليکلي، ماليزيا هېواد کې افغانانو ته د پاسپورتونو د وېش لړۍ پیل شوه.
نوموړي یاد هېواد کې د افغان سفير له قوله ليکلي، چې افغانانو ته به په شفاف او چټک ډول قونسلي خدمات وړاندې کړي.
هغه په ښه ډول دغه هېواد کې د حکومت د استازولۍ ډاډ هم څرګند کړی دی.
له ماليزيا وړاندې په ازبکستان، ایران او پاکستان کې هم افغان کډوالو ته د پاسپورتونو د ورکړې لړۍ پیل شوې وه.
په نورو هېوادونو کې افغانانو ته د پاسپورتونو د وېش لړۍ داسې مهال پيلږي، چې په کور دنننه هم زيات شمېر افغانان د پاسپورتونو د ترلاسه کولو په برخه کې له ستونزو سره مخ دي.
دوی وايي، له مياشتو - مياشتو انتظار وروسته هم د پاسپورتونو په ترلاسه کولو نه بریالي کیږي.
بل لور ته بیا د پاسپورت رياست مسوولان وايي، هېواد کې د پاسپورتونو د وېش لړۍ یې لا چټکه کړې او هڅه کوي، چې ټولو غوښتونکو ته پر وخت پاسپورتونه وويشي.
دغه رياست څو ورځې وړاندې اعلان وکړ، چې تر دې وروسته به د انلاین فورمو تر څنګ په ساده عریضو هم د پاسپورتونو د وېش لړۍ پیل کړي.
د پاسپورت عمومي رياست په تېرو شپږو میاشتو کې ۶۴۴ زره پاسپورټونه وېشلي دي.
د یاد ریاست د معلوماتو له مخې له دې درکه یې شاوخوا درې میلیارده او ۶۲۸ میلیونه افغانۍ عواید هم راټول کړي دي.
