کابل (کوه نور، ۲ لیندۍ ۱۴۰۴): د مالیې وزارت اعلان کړی، چې له ګاونډي هېواد پاکستان سره د سوداګریزو اړیکو پرېکون پر هېواد هیڅ ډول منفي اغېز نه دی کړی؛ بلکې د هېواد سوداګریزې اړیکې له نړۍوالو سره په عادي توګه روانې دي.
مالیې وزارت پر خپله اېکس پاڼه لیکلي، پاکستان سره د سوداګرۍله بندولو وروسته په ګمرکي محصولاتو کې هم هیڅ ډول کموالی نه دی راغلی او د هېواد له ګمرکونو څخه په عادي توګه د سوداګرۍ پړاوونه ترسره کېږي.
خبرپاڼه کې همداراز راغلي، مالیې وزارت د هېواد په ټولو ګمرکاتو کې کورنیو او بهرنیو سوداګرو لپاره د پام وړ اسانتیاوې رامنځته کړي؛ ترڅو له پاکستان پرته له نورو ګاونډیو، سیمې او نړۍ سره سوداګرۍته ادامه ورکړي.
د مالیې وزارت ټولو کورنیو او بهرنیو سوداګرو ته ډاډ ورکړی، چې د پاکستان پر ځای بدیلو لارو کې به د سوداګرو ملاتړ کوي او په اړوندو برخو کې یې د لا ډېرو همکاریو ژمنه کړې ده.
