د بهرنیو چارو وزارت د وياند مرستیال حافظ ضيا احمد تکل وايي، د دغه وزارت سرپرست امیرخان متقي د روسيې له ځانګړي استازي ضمير کابلوف سره په ليدنه کې د ملګرو ملتونو په نوښت د افغانستان په تړاو په دوحه کې د راتلونکي ناستې او همدارنګه د افغانستان او روسيې تر منځ په سياسي او اقتصادي مسایلو سربېره پر ځينو سيمهييزو مسايلو خبرې کړې دي.
هغه زیاته کړه چې ښاغلي متقي د روسيې له ځانګړي استازي سره په ليدنه کې ویلي، د افغانستان په تړاو دوحه کې د درېیمې جوړېدونکې غونډې په اړه د ملګرو ملتونو له استازو سره په خبرو بوخت دي او د اجنډا او ترکیب تر روښانه کېدو وروسته به پکې د خپل ګډون یا نه ګډون په اړه پرېکړه وکړي.
د هغه په وینا، ښاغلي متقي زیاته کړې چې په دې اړه به له پوره وضاحت وروسته خپل دريځ څرګند کړي.
د يادونې ده چې د ملګرو ملتونو په نوښت د افغانستان په اړه په دوحه کې د راتلونکې غونډې نېټه لا نه ده اعلان شوې.
