د بهرنيو چارو وزارت سرپرست امير خان متقي، د مسکو فارمټ څنډه کې د چين او پاکستان له ځانګړيو استازو سره ناسته کړې ده.
د بهرنيو چارو وزارت په يوې خبرپاڼه کې وايي، په دې ناسته کې د افغانستان، پاکستان او چين پر اړيکو، مشترکو ګټو او تهديدونو مفصلې خبرې وشوې.
د افغانستان د بهرنيو چارو وزارت سرپرست امیر خان متقي، پاکستان سره د افغانستان اړيکې دوستانه بللي او ټينګار یې کړی، چې د ستونزو د راپورته کېدو پرمهال بايد د رسنيزو څرګندونو پرځای له ديپلوماتيکو لارو يې د اواري هڅه وشي..
خبرپاڼه زياتوي، د پاکستان استازي هم ټينګار وکړ چې ستونزې د دوو اړخيزو ديپلوماتيکو چينلونو له لارې اوارې شي.
خبرپاڼه کې راغلي، چينايي لوري د افغانستان او پاکستان د دوې اړخيزې ديپلوماسۍ ستاينه وکړه چې پر وخت يې اړوندو مسئلو ته حللاری موندلي دي.
چينايي لوري همداراز ډاډ څرګند کړی، چې په سيمه کې د امنیت، ثبات او پرمختګ د ملاتړي هېواد په توګه چمتو دی چې افغانستان سره په ګڼو برخو کې خپلې مرستې لا زياتې کړي.
افغانستان او پاکستان داسې مهال د ډيپلوماتيکو لارو د ستونزو پر حل ټينګار کوي، چې وروستيو ورځو کې د تورخم دروازې د بندېدو پر مهال دواړو لورو د يو بل پر توندې څرګندونې وکړې.
پاکستانی لوری همېشه افغانستان د پاکستاني طالبانو تحريک د غړو د شتون ادعا کوي؛ خو افغان لوري بيا همېشه دغه ادعا ردوي او دا کار د پاکستان داخلي موضوع يادوي.
