کابل (کوه نور، ۲۸ مېزان ۱۴۰۴): د ملګرو ملتونو د کډوالو عالي کمېشنرۍ "UNHCR" د معلوماتو له مخې، ایټالیا افغانستان ته له راستنېدونکو او ټولنیزو ستونزو له لحاظه له سختو شرایطو سره مخ افغانانو سره د مرستې لپاره دوه میلیونه یورو ځانګړې کړې دي.
دغه ادارې نن ورځ، پر خپله ایکس پاڼه لیکلي، چې دا مرسته به د بېرته راستنېدونکو افغانانو د بیا یوځای کېدو "ادغام" لپاره ولګول شي او له ۲۰ زره ډېرو کسانو ته به ورسېږي، چې ډېری یې ښځې او نجونې دي.
دا مرستې په داسې وخت کې ترسره کېږي، چې په تېرو میاشتو کې له ایران او پاکستانه د افغان مهاجرو جبري ایستل ډېر شوي دي.
بلخوا، د افغانستان او پاکستان تر منځ د پولو ستونزې لا هم دوام لري.
د پاکستان د دفاع وزیر خواجه محمد آصف ویلي، هغه افغان کډوال، چې قانوني اسناد ولري کولای شي په پاکستان کې پاتې شي؛ خو بې اسنادو کسان به بېرته افغانستان ته واستول شي.
باید وویل شي، چې تر دې مخکې، د بشري حقونو ډلو خبرداری ورکړی و، چې د کډوالو په جبري توګه بېرته ستنول به د بېوزلۍ، بېثباتۍ او د ملاتړ نشتوالي له امله په افغانستان کې بشري او اقتصادي بحران لا پسې سخت کړي.
