د ملګرو ملتونو د ماشومانو د حقونو کمېټې له پاکستانه د افغان کډوالو ماشومانو د جبري ايستنې په اړه اندېښنه څرګنده کړې او ویلي یې دي، چې په اېستل شوو کډوالو کې بېسرپرسته ماشومان هم شامل دي.
ددغې کمېټې د راپور له مخې، دا بهیر ماشومان د کورنیو له جلا کېدو او ناوړه چلند په ګډون د بشري حقونو له جدي ستونزو سره مخ کوي.
یادې کمېټې له پاکستانه غوښتنه کړې چې د کډوالو لپاره ملي قانون تصویب او د پناه غوښتنې منظمه تګلاره دې رامنځته کړي .
د ملګرو ملتونو دې کمېټې دغه راز له پاکستانه غوښتي، چې دا هېواد باید د ستنولو اصل ته د درناوی وکړي او دا پلان دې یو وار بیا وارزوي.
دا په داسې حال کې ده، چې له پاکستانه د افغان کډوالو د جبري اېستلو لړۍ چټکه شوې او داسې ماشومان هم اېستل شوي، چې کورنۍ یې لا هم په پاکستان کې دي.
