د ننګرهار ولایت رسنیو دفتر خبر ورکړی چې د یاد ولایت په نهو ناحیو کې د جلال اباد ښاروالۍ سره همکارو موسسو د ۳۱۵ میلیونه افغانیو په ارزښت ۴۲ پروژو کارونه دوام لري.
په خبرپاڼه کې راغلي چې په یادو پروژو کې د سرکونو کانګریټ، د پلو لارو، ویالو، استنادي دېوالونو او سولري رڼا جوړولو کارونه شامل دي.
خبرپاڼې د ننګرهار ښاروالۍ د مرستیال مولوي اسحاق سعید له قوله لیکلي چې له یادو پروژو څخه یې د اته پروژو کارونه پای ته رسېدلي، د ۱۴ پروژو کارونه دوام لري او د ۲۰ نورو د کارونو د پیل کېدو لپاره تدارکاتي چارې روانې دي.
هېره دې نه وي چې په یادو پروژو ۲۵۰۰۰ کسانو ته د کار کولو زمینه برابره شوې ده.
