د صنعت او سوداګرۍ سرپرست وزير له ازبکستان څخه تر راستنېدو وروسته ويلي، په دغه هېواد کې د افغاني توکو په جوړ شوي نندارتون کې ۷۵ سلنه توکي پلورل شوي دي.
نوموړي دغه راز ويلي، د افغان او ازبک سوداګرو ترمنځ د سل ميليونه ډالرو په ارزښت بېلابېل تړونونه شوي چې او دغه راز په ترجيحي سوداګرۍ هم خبرې اترې شوي دي.
د سرچينې په خبره، د دواړو هېوادونو ترمنځ په اوولس سکټورونو کې د اسانتياوو په رامنځته کولو هم خبرې شوي دي.
ياد نندارتون چې د ازبکستان پلازمینه تاشکند کې جوړ شوی وو، پکې ۲۵۰ تنه سوداګرو او صنعتکارانو برخه اخيستې وه او دغه راز د هېواد کورني تولیدات پکې نندارې ته ایښودل شوي وو.
سرپرست وزير دغه راز ويلي، د افغان _ ټرانس رېل پټلۍ په اړه يې هم له ازبک چارواکو سره خبرې کړي او په دغه برخه کې د همکاريو هوکړې ته رسېدلي دي.
