د کليو د بيا رغونې او پراختيا وزارت په يوه خبر پاڼه کې ويلي، د سرپرست حکومت د رهبرۍ د حکوم پر اساس د نيمروز په خاشرود ولسوالۍ کې د اوبو ستر بند جوړيږي.
په دغه بند به شاوخوا ۲مليارده افغانۍ لګښت راشي، چې له تخنیکي سروې وروسته به يې چارې عملا پیل شي.
دغه بند د ۵۰ متره په لوړوالي سره جوړيږي، چې په اټکلي توګه به ۶۰ مليون مکعب متره اوبه ذخیره کوي او همداراز به په خاشرود، ګلستان، دلارام، غورغوري او چخانسور ولسوالیو کې اته زره هکتاره ځمکه هم خړوبه کړي.
تر دې وړاندې حکومت هم په شمال کې د قوشتېپې کانال د لومړي فاز چارې پای ته ورسولې چې د هېواد له لويو کانالونو څخه شمېرل کيږي.
سرپرست حکومت وايي د اوبو مدیریت يې له لومړيتوبونو څخه دی.
د بهرنيو چارو وزارت سياسي مرستيال عباس ستانکزي تېره ورځ په کاپيسا کې يوې غونډې ته د خبرو پر مهال ويلي وو، چې د اوبو د مدیریت ښه وړتيا لري او د افغانستان اوبه به په راتلونکي کې د تېلو په بیه وي.
