د اوبو او انرژۍ وزارت مسوولانو خبر ورکړی چې هرات کې د ۶۲ میلیونه ډالرو په ارزښت د بادي برېښنا ۲۰۰ مېګاواټه او تر ټولو قوي پروژه پرانیستل شوې ده.
د یاد وزارت د سرپرست پر وینا چې په دغه برخه کې یو ترکیې شرکت پانګونه کوي.
د برېښنا شرکت اجرایوي مشر عبدالباري عمر نن ورځ "شنبه، د جوزا لسمه"په همدې تړاو جوړو شوو مراسمو کې ویلي چې د دغه ۲۰۰ مېګاواټه بادي برېښنا پروژې د لومړي فاز کارونه چې ۴۳,۲ مېګاواټه برېښنا تولیدوي نن د لوړ پوړو چارواکو په شتون کې پیل شوي دي.
عمر پخپلو خبرو کې ویلي «تقریبآ د برېښنا ټولې پرمختیايي پروژې له کورنۍ بودیجې تامین او بشپړیږي او هېڅ ډول بهرنی ملاتړ نهلري.»
د مسوولانو پر وینا له دې ۲۰۰ مېګاواټه بادي برېښنا سره به په هرات کې د صنعت کارانو د برېښنا د برخې ستونزې حل شي.
بل خوا هرات کې د بادي برېښنا د تولید پروژه د یاد ولایت د اوسېدونکو له هرکلي سره مخ شوې او د دغه ولایت اوسېدونکو ویلي چې د اوړي او ژمي په موسمونو کې د برېښنا د نشتون له امله له ګڼو ستونزو سره مخ وو.
د یاد ولایت یو تن اوسېدونکي احمد په دې اړه له رسنیو سره په خبرو کې ویلي چې «د هرات ولایت ډېر باد لري له دولته زموږ غوښتنه د اده چې په دې برخه کې پانګونه وکړي او دغه برېښنا خلکو ته ورسېږي او موږ له هغې استفاده وکړای شو.»
د هرات سیمه ییزو مسوولانو ویلي چې د بادي بریښنا د تولید د پروژې د کارونو پیلېدو ته یې پوره چمتووالی نیولی.
د مسوولانو پر وینا د دغه پروژې له پیلېدو سره به د یاد ولایت سلګونه خلکو ته د کار کولو زمینه برابره شي.
په همدې حال کې د هرات ولایت د والي ویاند نثار احمد الیاس په دې تړاو ویلي «د دغه تړون پر بنسټ ټاکل شوې، ۷۷ ترکي شرکت د تخنیکي مطالعاتو له بشپړېدو وروسته د ۲۰۰ میګاواټه برېښتا د تولید پروژه له یوه کال وروسته پيل کړي.»
باید وویل شي د برېښنا شرکت مسوولانو نن په هرات کې د پنځه مېګاواټه لمریزې برېښنا پروژه پرانیستې ده.
