د هلمند ځایې مسوولانو خبر ورکړی چې د یاد ولایت د ګرشک ولسوالۍ په دهمزنګ سیمه کې د یوه خصوصي شرکت له خوا په ۶۵۰ جریبه ځمکه کې د یوه ښارګوټي د جوړولو کارونه پیل شوي دي.
د مسوولانو پر وینا دغه ښارګوټی چې د یوه خصوصي شرکت لخوا یې د جوړېدلو کارونه پرمخ وړل کېږي د هلمند ولایت د ګرشک ولسوالۍ په دهمزنګ سیمه کې جوړېږي.
د مالوماتو له مخې په دغه ښارګوټي کې به کورونه، د اوبو منظم سیستم، روغتیایې مرکزونه، ښوونځي، تجارتي مارکیټونه او د لوبو میدانونه موجود وي.
محمد عیسی عمری چې د دغه خصوصي شرکت مسوول دی له رسنیو سره په خبرو کې ویلي چې دا ښارګوټی په ۶۵۰ جریبه ځمکه جوړېږي چې پکې به ۲۷۰۰ کورونه، ۱۰۰ مارکیټونه، ښوونځي، د لوبو میدانونه، روغتیایې مرکزونه او نور امکانات موجود وي او د جوړېدو پر مهال به یې ۲۰۰۰ تنو ته پکې د کار کولو زمینه برابره شي.
