د مخابراتو او مالوماتي ټکنالوجۍ سرپرست نجیب الله حیات حقاني پکتیا ولایت ته د خپل سفر په ترڅ کې ټول هېواد کې د ۵۵۰ مخابراتي سایټونو د فعالولو خبر ورکړی دی.
حقاني ویلي د دغه ۵۵۰ مخابراتي شبکو له فعالولو سره به د هېواد په لري پرتو سیمو د اوسېدونکو د دغه برخې شته ستونزې حل شي.
حقاني ویلي دغه مخابراتي سایټونه به د بېلابېلو مخابراتي شبکو له خوا جوړ شي.
د مخابراتو او مالوماتي ټکنالوجۍ وزارت سرپرست ویلي «په دې نوي پروژه کې مو په ټول هېواد کې د ۵۵۰ سایټونو پلان نیولی دی. تاسو د پکتیکا ولایت یادونه وکړه، له یاده شوو سایټونو څخه ۷۴ یې د پکتیکا ولایت مرکز او لیرې پرتو ولسوالیو لپاره منظور شوي دي.»
په همدې حال کې د پکتیا یو شمېر اوسېدونکو یاد ولایت کې د مخابراتي خدمتونو د ښه کېدلو او د شبکې د پوښښ ساحې د پراختیا غوښتنه کړې ده.
د مخابراتو او مالوماتي ټکنالوجۍ وزارت د مالوماتو له مخې په دغه سایټونو کې د پکتیا ولایت لپاره ۴۸ او د پکتیکا لپاره ۷۴ مخابراتي سایټونه منظور شوي چې په مرکزي سیمو او ولسوالیو کې به نصب شي.
