د پاکستان د لنډ مهالي حکومت د کورنیو چارو وزیر سرفراز بګټي ویلي له هغو افغان کډوالو سره کار نه لري چې د بهرنیو هېوادونو ویزو ته په تمه دي.
نوموړي د لویدیځو هېوادونو له یو شمېر دیپلوماتانو سره په کتنه کې ویلي، یوازې به هغه کډوال له خپلې خاورې وباسي چې په ناقانونه ډول اوسېږي.
د پاکستاني رسنۍ ایکسپریس ټریبون د معلوماتو له مخې، بګټي ویلي، لویدیځ هېوادونه باید د هغو کډوالو په اړه اندېښنه ونه کړي، چې د بهرنیو هېوادونو د ویزو په لټه کې دي.
دا په داسې حال کې ده چې تېره جمعه د امریکا د بهرنیو چارو وزارت ویاند مېتیو میلر له پاکستان څخه غوښتي و، چې د نړیوالې پناه غوښتنې په لټه افغان کډوال باید ونه اېستل شي.
بل لورته بیا شاوخوا ۸۰ امریکايي ډیپلوماتانو هم په یو پرانیستي لیک کې له پاکستان غوښتي چې د افغان کډوالو د اېستلو پروسه ودروي.
دا په داسې حال کې ده چې تازه اروپايي ټولنې هم له پاکستان څخه د افغان کډوالو د اېستلو په اړه اندېښنه ښودلې او ویلي یې دي چې دا پرېکړه به ډېر افغانان اغېزمن کړي.
