د ایران په بېلابېلو زندانونو کې نږدې ۲۰۰ افغان بندیان د یاد هېواد د حکومت لخوا سرپرست حکومت ته سپارل شوي دي.
د زندانونو چارو سمون ادارې ریئس محمد یوسف مستري ددغه بندیانو جرم په ایران کې د نشه یې توکو قاچاق او ساتل یاد کړي دي.
نوموړي ویلي دغه افغان بندیان ۱۹۹ تنه دي چې د هېواد په بېلابېلو ولایتونو پورې تړاو لري او د یوې اوونۍ په اوږدو کې به خپلو کورنیو ته وسپارل شي.
ایراني چارواکو هم ویلي چې دغه بندیان په یاد هېواد کې د نشه یې توکو د قاچاق، جنایې جرمونو او له پولې په غیر قانوني توګه د اوښتو په تور نیول شوي و چې بیرته سرپرست حکومت ته سپارل شوي دي.
دغه ۱۹۹ تنه افغان بندیان له ایرانه په داسې حال کې هېواد ته راستنېږي چې یوه میاشت مخکې هم له ۲۰۰ ډېر افغان بندیان د نیمروز بندر له لارې له ایرانه هېواد ته را اړول شوي وو.
د نیمروز د سیمه ییزو مسوولانو په وینا له ایرانه به هېواد ته د افغان بندیانو د رالېږلو لړۍ دوام لري.
د یادونې وړ ده چې ددغه بندیانو له ډلې ګڼ شمېر یې د اوږد مهاله بند په سزا محکوم شوي و.
