کابل (کوه نور، ۱۰ سنبله ۱۴۰۴): د اوبو او انرژۍ وزارت د هېواد په یو شمېر ولایتونو کې د اوبو کچې لوړېدو او سېلابونو راوتلو خبرداری ورکړی دی.
د یاد وزارت له لوري په خپره شوې خبر پاڼه کې راغلي، چې د وږي له ۱۱مې څخه تر ۱۳مې پورې د نسبتا تېزو بارانونو وړاندوینه شوې ده.
سرچینې زیاته کړې، چې په یادو ولایتونو کې خوست، پکتیا، لوګر، کاپیسا، ننګرهار، کونړ او نورستان شامل دي.
د اوبو او انرژۍ وزارت له خلکو غوښتي، چې د سېلابونو پر مهال سیندونو ته له نږدې کېدو ډډه وکړي.
یاد وزارت دا خبرداری داسې مهال ورکړی، چې روانه اوونۍ په ننګرهار کې د سېلابونو له امله ۵ تنه مړه او ۱۵ نور ټپیان شوي وو.
په افغانستان کې هر کال د ورښتونو او سېلابونو له امله سلګونه کسان خپل ژوند له لاسه ورکوي او لسګونه د استوګنې کورونه او زرګونه هکټاره کرنیزې ځمکې زیانمنېږي.
