د پکتیا ولایت ځایې مسوولانو خبر ورکړی چې د یاد ولایت په مرکز او بېلابېلو ولسوالیو کې د جاپان هېواد په مالي مرسته د معارف وزارت لخوا د ۱۵ ښوونځیو د جوړولو کارونه چې ۱۹۲ میلیونه افغانۍ لګښت پرې راغلی پای ته رسېدلي دي.
د دغه ولایت چارواکو پرون ورځ"دوشنبه، د غبرګولي په ۱۲"تاریخ خبر ورکړی چې دغه ۱۵ ښوونځي د معارف وزارت د سرپرست او یو شمېر سیمه ییزو چارواکو په شتون کې د یوې غونډې په ترڅ کې ګټې اخیستنې ته سپارل شوي دي.
د راپورونو په اساس له دغه ۱۵ ښوونځیو یو یې په مرکز او ۱۴ نور په بېلابېلو ولسوالیو کې جوړ شوي چې ۱۹۲ میلیونه افغانۍ مجموعې لګښت پرې راغلی دی.
د پکتیا د معارف ریاست د مالوماتو په اساس دغه ښوونځي د جاپان هېواد په مالي لګښت او د یاد ریاست تر څارنې لاندې جوړ شوي دي.
باید وویل شي چې دغه ۱۵ ښوونځي هر یو د شپږ درسي خونو لرونکی، یوه اداري خونه، د پاکو اوبو سیستم، د پنځه کیلو واټه لمریزو برېښنایې سیستم پانو، احاطه لرونکي دېوال او د نورو تعلیمي اسانتیاوو درلودونکي دي.
