د احصايې او معلوماتو ملي ادارې د نفوسو د احوال ثبتولو خدمتونو ریاست د روان کال په تېره غويي میاشت کې یوازې کابل ښار کې ۱۰زره او ۹۵۰ کسانو ته زېږون کارتونه وېشلي دي.
بله خوا یاد ریاست په کابل ښار کې تېره میاشت ۵ زره او ۸۳۱ کسانو ته د نوې او مثنی تذکرې د وېش او کاغذي تذکرو د لغوه کولو ترڅنګ ۷ زره او ۱۱۷ تنو ته د کاغذي تذکرې د تایید خدمتونه او دغه راز ۲ زره او ۶۸۲ نورو کسانو ته د تذکرو اړوند غیرحضوري خدمتونه وړاندې کړي دي.
د معلوماتو له مخي، د نفوسو د احوال ثبتولو خدمتونو ریاست په تېره میاشت کې ۱۰ زره او ۱۲۸ کسانو ته په کاغذي تذکرو کې د اصلاحاتو د راوستو خدمتونه وړاندې کړي او دغه راز یې د خدماتي څانګو له لارې ۳۹۴ نورو کسانو ته د مړینې پارچې هم وېشل شوي دي.
د یادونې وړ ده چې د احصايې او معلوماتو ملي ادارې د نفوسو د احوال ثبتولو خدمتونو رياست په حضوري او غيرې حضوري ډول د کاغذي تذکرو، زېږون کارتونو او د مړينې پارچو د وېش؛ د هېواد د هوايي ډګرونو او ځمکنيو رسمي بندرونو له لارې د بهرنيو وګړو د تګ او راتګ د ثبت مسوليتونه پر غاړه لري.
