تېره شپه شاوخوا ۷:۳۰ بجې د کابل ښار د دشت برچي سیمې په یو ورزشي کلب کې چاودنه رامنځته شوه چې د تلفاتو په اړه بیلابیل راپورونه ورکړل شوي دي.
د کابل امنیه قومنداني ویاند خالد ځدراڼ له چاودنې یو ساعت وروسته رسنیو ته ومنله چې په دغه پېښه کې دوه تنه وژل شوي او نهه نور ټپیان شوي دي.
خو یو شمېر ځایي سرچینې بیا وایي، چاودنه کې لږ تر لږه شپږ کسان وژل شوي او له لسو ډیر نور ټپیان دي.
تراوسه د چاودنې څرنګوالی نه دی معلوم خو ځدراڼ وایي، د چاودنې د څرنګوالي معلومولو په موخه یې سیمې ته د څېړنې ټیم استولی دی.
د یادونې ده چې د دغې چاودنې مسوولیت تراوسه چا په غاړه نه دی اخیستی.
