د ټولګټو وزارت خبر ورکړی چې په کندوز کې د بار وړونکو موټرو د وزن د مالومولو لپاره یې د لوړ تناژ تله چې ۷,۵ میلیونه افغانۍ لګښت پرې شوی لګولې ده.
د یاد وزارت لخوا په خپره شوې خبرپاڼه کې راغلي چې د لوړ تناژ دغه تله د کندوز ولایت د دشتي ارچي ولسوالۍ په دشت ابدان سیمه کې د موټرو د وزن مالومولو او د سرک د خرابوالي د مخنیوي په موخه لګول شوې ده.
د ټولګټو وزارت د مسوولانو د مالوماتو له مخې ددغه تلې د جوړېدلو کارونه د تېر کال په تلې میاشت کې پیل شوي و چې د کندوز ولایت د ټولګټو ریئس عبدالخالق حقمل او نورو مسوولانو په شتون کې ګټې اخیستنې ته وسپارل شوه.
د یادونې وړ ده چې د ټولګټو وزارت له خوا نه د هېواد په یو شمېر سیمو کې د موټرو د وزن مالومولو په موخه د لوړ تناژ تلې لګول شوې دي.
