کابل (کوه نور، ۱۲ سنبله ۱۴۰۴): د هېواد په ختیځ کنړ او نورو ولایتونو کې نن د زلزلې درېیمه ورځ پوره شوې او د اسلامي امارت چارواکو ویلي، چې په زلزله ځپلیو سیمو کې لا هم د ژغورنې عملیات روان دي.
د کنړ ولایت د اطلاعاتو او کلتور ریئس نجیب الله حنیف نن د یاد ولایت له ملي راډیو ټلوېزیون سره په خبرو کې ویلي، که څه هم د کنړ ولایت په یو شمېر سیمو کې د ژغورنې عملیات پای ته رسېدلي؛ خو لا هم د ځینو درو په لري پرتو کلیو او بانډو کې، چې د لارو د خرابوالي له امله پکې د ژغورنې عملیات له ځنډ او خنډ سره مخ دي تر اوسه د قربانیانو لټون روان دی.
حنیف ویلي، د زلزلې له امله د سیمې د جغرافیې او سرکونو خرابوالي غټې ستونزې را ولاړې کړې دي.
د حنیف پر وینا، یو شمېر سیمو کې لا هم خلک تر خاورو لاندې دي او د راویستلو هڅې یې روانې دي.
نوموړي ویلي، داسې سیمې هم شته، چې ورتګ ناممکن دی او هلته پنځه یا شپږ ساعته پلي مزل کول غواړي؛ خو بیا هم هڅه کېږي، چې زیانمنو شویو کورنیو ته مرستې ورسېږي.
