د کورنيو چارو وزارت وياند پر خپله اېکسپاڼه ليکلي، د نشهيي توکو پر وړاندې د مبارزې پوليسو ۶۲۶ جريبه کوکنار په اروزګان، ۲۳ جريبه په ننګرهار، ۲۰ جريبه په بدخشان، ۶ جريبه په لغمان، يو جريب په سرپل او همداراز يې په هرات کې هم یو اندازه کرل شوي کوکنار له منځه وړي دي.
د سرچينې په خبره، غور کې يې درې تنه د نشهيي توکو د قاچاق په تور نیولي هم دي.
د سرپرست حکومت د مشرتابه په فرمان په ټول هېواد کې د نشهيي توکو پر کښت بنديز لګېدلی او تراوسه د هېواد په مختلفو ولايتونو کې په زرګونه جريبه ځمکه کرل شوي کوکنار اړول شوي دي.
د يادونې ده چې د افغانستان په اړه د ملګرو ملتونو وروستيو راپورونو په دغه هېواد کې د نشهيي توکو پر وړاندې د مبارزې هرکلی کړی دی.
