د عامې روغتيا وزارت وايي، د بدخشان ولایت واخان ولسوالۍ پاميري هېوادوالو ته د څلوېښت ميلیونه افغانيو په لګښت لومړنی روغتيايي مرکز جوړ شو.
دغه وزارت په یوې خبرپاڼه کې ويلي، چې دا تېره تېره يوي پېړۍ کې د پامير قوم لپاره لومړنی معياري جوړ شوی روغتيايي مرکز دی.
د عامې روغتيا وزارت د مالي او اداري چارو مرستیال، محمد اسحق صاحبزاده د ياد روغتيايي مرکز د پرانیستې پر مهال ويلي: «اسلامي امارت د هېواد ټولو وګړو ته د خپلو حقوقو ورکولو او روغتيايي خدمتونو وړاندې کولو لپاره ژمنتيا لري، زمونږ هڅه همدا ده چې د هېواد تر هر وګړي معياري روغتيايي خدمتونه و رسېږي.»
نوموړي همداراز وویل، د عامې روغتيا وزارت نه يواځې په واخان؛ بلکې د هېواد په ټولو لرې پرتو سیمو کې همدې ته ورته عملي کړنو ته ژمنتیا لري
صاحبزاده زیاته کړې، په نږدې وخت کې به په همدې روغتیايي مرکز کې د جراحي متخصص او ځينې نورو روغتيايي کار کوونکو ګمارنه هم تر سره شي؛ تر څو وکولای شي همدلته زمونږ د پامير مېشت هېوادوالو ستونزې حل کړي.
