هند کې نن د نړۍ د شلو سترو صنعتي هېوادونو غونډه پیل شوه
د نړۍ د شلو صنعتي هېوادنو سرمشریزه نن د هند په پلازمېنې نوې ډهلې کې پرانیستل شوه.
د جي شل ډلې د غړو هېوادونو مشران به په نوي ډیلي کې د نړۍ پر کړکېچونو، د خوړو نه خوندیتوب، په اوکراین کې د جګړې، انرژۍ اواقتصادي مسایلو په اړه خبرې وکړي.
هندي رسنۍ وايي، چې په دې دوه ورځنۍ غونډه کې د ګډون لپاره د امریکا د ولسمشر جوبایډن ورغلی خو روسيې ورته د بهرنیو چارووزیر سرګي لاوروف او چین ورته صدراعظم لي یانګ استولي دي.
هند د مېلمنو د تګ راتګ پر لارو د بېوزلو پنډغالي د عامه لید د پټېدو په موخه پوښلي او ښار یې په بېلابېلو ډولونو سینګار کړی دی.
جي شل یا د شلو ګروپ د هغو هېوادونو یوه ډله دی، چې د نړیوالو اقتصادي او سیاسي مسئلو په اړه خبرې اترې کوي.
د جي شل هېوادونو غړي د نړۍ د اقتصادي تولید ۸۵ سلنه جوړوي او د نړۍ له ۷۵ سلنې زیاته سوداګرۍ د دوی په لاس کې ده.
همدارنګه د نړۍ دوه پر درېیمه برخه نفوس هم دوی جوړوي.
